Sumar á næsta leiti

18.5.2011 | 23:19

Jæja, þá sannast hið fornkveðna einu sinni enn, að sumarið kemur að öllum jafnaði ekki fyrr en í júní, sama hvað okkur finnst um það, og þannig verður það líklega um ókomna tíð. Vorið kemur og blekkir okkur með góðu veðri í nokkra daga, en áður en hendi er veifað skellir það bara á okkur kalsa og hreti þegar síst varir - og mun líklega halda því áfram svo lengi sem elstu menn munu tóra. (Þetta með elstu mennina og auðvitað konurnar líka, finnst mér svo gáfulegt að ég mátti til með að skella því þarna).

En fátt er svo með öllu illt, því nú eigum við bara gott í vændum, þegar sumarið brestur á með öllu sínu dirrindíi.

Skellti mér í útiverkin í garðinum, eftir að tveir ungir menn komu og rökuðu allt laufið eftir veturinn. Nú byrjar uppáhalds vinnnan mín, að slá grasið. Ég held ég viti fátt jafn leiðinlegt. Síðan tekur við málningarvinna og allskyns dútl, þangað til kemur að því að slá aftur. En ég held nú samt að inn við beinið og að velhugsuðu máli, að mér sé ekki eins leitt og ég læt með sláttuvélina, en stundum tekur þó allt of langan tíma að koma sér í gang með hana.

Nú er Listahátíð á næstu grösum og margt spennandi framundan. Keypti miða Faust þeirra Vesturports snillinga og mikið hlakka ég til. Þá bíða mín miðar á 4. sinfoníu Mahlers í Hörpu daginn eftir.

Sýningunni minni í Iðusalnum lýkur þann 25.þm. og ekki get ég kvartað undan aðsókn eða undirtektum. Ætla að vera við á sýningunni á laugardag og sunnudag, þ.e. núna um helgina. Ef einhverjir sem þetta lesa hafa áhuga á að koma eru þeir hinir sömu velkomnir og ég mun taka vel á móti þeim.

Vona að veðrið verði Listahátíðargestum, svo og þeim sem ætla að skemmta okkur utandyra, hagstætt t.d. spænsku loftfimleikadönsurunum, sem ég hlakka mikið til að sjá, ásamt öllum hinum sem koma til með að gleðja geð okkar borgarbúa, sem og aðra gesti hátíðarinnar, innlenda og erlenda.

Menningin á eftir að setja sitt mark á þessa daga, flestum til ánægju, en fýlupúkarnir sem væla undan öllu verða örugglega í miklum minnihluta.

Flokkur: Bloggar | Facebook

Athugasemdir

Vonandi hefurðu rakað laufin ofan á beðin þín Bergljót mín Því þau eru eitthvað mest jarðvegsbætandi efni sem maður setur í þau á vorin fyrir utan að vernda viðkvæman gróður í hretum.

Ég sé að ég kemst ekki á sýninguna þína, ætlaði að koma suður á síðustu helgi en því miður varð ég að gera annað. Kemst því ekki fyrr en um 12 júní. Ég er viss um að sýningin þín hefur vakið mikla lukku, myndirnar sem þú hefur sett hér inn bera þess merki að þetta er falleg og vel unnin sýning.

Það er alltaf gott að njóta góðrar tónlistar, segi bara góða skemmtun.