Strákarnir Okkar

Jæja, nú eru blessaðir handboltastrákarnir orðnir Strákarnir Okkar enn einn gang, og það með 320 000 manna stolti.  Þjóðin stendur á öndinni og taugar landsmanna eru þandar til hins ítrasta. Ég er þess fullviss að jafnvel karlægt fólk rís upp við dogg og hvetur Strákana Okkar á skerminum.

Þeir tala um það Þorsteinn og Co. á stöð 2 sport að þjóðin sé öll orðin eins og þjálfari og þeir ættu að eiga auðvelt með að vinna hafandi á fjórða hundrað þúsund þjálfara. Víst er að þeir heilla alla þjóðina upp úr skónum á meðan þeir vinna hvern leikinn á fætur öðrum, en hversu oft hefur það ekki gerst í gegnum tíðina að þeir tapa og þá verða þeir allt í einu bara strákarnir eða handboltalandsliðið og þetta hlýlega Okkar hverfur úr máli manna

Mér finnst það alger heimtufrekja að "afokkara" þá oftast þegar móti blæs, því þeir þurfa allan stuðning sem þeir geta fengið, alltaf,  hvernig sem fer. Við rekum ekki börnin okkar að heiman þó þau standi sig ekki allskostar á stundum, því finnst mér að við eigum að hætta að taka Strákana Okkar í fóstur tímabundið,en standa alltaf með þeim, alla leið.

Athugasemdir

[Jenný Stefanía Jensdóttir, 19.1.2011 kl. 04:48]

Tek undir þetta  mín kæra, það má alls ekki afokkara þessa stráka, meira segja þó að "hver er hann, hvaðan kom hann, hvert fer hann" sé á leið úr landi.

"Þeir" eru á hinn bóginn sérstök tegund, sem stundum var sagt um; "þeir redda þessu örugglega", "þeir geta ekki látið þetta gerast", "af hverju taka þeir ekki í taumana", "þeirra tími er liðinn" og klæðast aðallega  jakkafötum en ekki  stuttbuxum!

Áfram okkar Ísland!

[Guðrún Emilía Guðnadóttir, 19.1.2011 kl. 12:52]

Ég hef nú ætíð sagt: " Elska þessa stráka hvort sem þeir vinna eður ei"
Áfram Island

[Ásthildur Cesil Þórðardóttir, 19.1.2011 kl. 13:26]

Ég horfi aldei á fótbolta eða aðrar boltaíþróttir.  Skil þær ekki og hef einfaldlega ekki áhuga á þeim, þó get ég verið stolt fyrir Íslandshönd þegar okkar fólki gengur vel á erlendum vettvangi áhvaða sviði sem það er.

[Bergljót Gunnarsdóttir, 19.1.2011 kl. 15:46]

 Jenný, það er nú málið með strákana okkar að þeir eru orðnir nokkuð margir í gegnum tíðina. Þeir eldast eins og aðrir og jafnframt bærast nýir hópar í skörðin. Þess vegna ér liðið síungt, þó menn taki ekki endilega eftir þessari stöðugu endurýjun.

Milla, ég elska þá líka og er búin að gera það í u.þ.b. 55 ár!

Ásthildur, mér finnst einhvernveginn óhugsandi að einhver hafi ekki áhuga, en svo margt sinnið sem skinnið. Eigum við þá ekki bara að segja að þeir hafi ekki nema 319. 999 aðdáendur.