Út úr hversdagsleikanum

 

Nú er Harpa komin í notkun og allt virðist vel heppnað. Hljómburðurinn er með því besta sem gerist og öll hönnun fyrsta flokks. Samt heyrast hjáróma raddir hér og þar hérna á blogginu til andmæla.

Við vitum öll að húsið var fokdýrt fyrir utan að kreppan skall á í miðju byggingarferlinu. Mér finnst það hið eina rétta hafi verið að klára húsið í stað þess að láta það grotna niður og láta allt sem búið var að leggja í það fara í súginn.

Þetta hús, nánast fullbúið í dag, verður þvílík lyftistöng fyrir menningarlíf Íslendinga að tilhlökkun er að.

Það er viðurkennd staðreynd að þegar kreppir að blómstrar menningin. Fólk dregur úr ýmissi annarri neyslu, en sækir því betur leikhús, tónleika og ýmsa aðra viðburði af menningarlegum toga.

Það mun útséð að rekstur hússins mun standa undir sér, bókanir berast víða að og framtíðin virðist blasa við þessu óskabarni svo margra samlanda minna.

Því miður er ekki öllum gefið að geta notið þess sem menningarlegt samfélag býður upp á, og meina ég þá að áhugi fyrir slíku er ekki til staðar, eða skilningur til að geta notið þess.

Flestir þeirra sem mótmæla Hörpunni bera fyrir sig kostnaðinn, en það er fullseint í rassinn gripið, því húsið er þarna, alveg stórglæsilegt, og þarna verður völ á hverjum stórviðburðinum á fætur öðrum,  en reksturinn á að standa undir sér.

Mér fyndist að þeir sem hæst hafa í mótmælum sínum ættu að bíða átekta og sjá hverju fram vindur, í stað þess að agnúast, jafnvel bara til að agnúast.

Útlit hússins er umdeilt, en þó fækkar þeim röddum sem finnst það ekki fallegt, enda hefur ekki verið svo auðvelt að sjá hvernig lokaniðurstaðan verður þegar allt er tilbúið bæði hús og lóð. En eins og Shakespeare sagði um árið   "Beauty is in the eye of the beholder" og aldrei hægt að samræma allan smekk, sem betur fer.

Að lokum vil ég óska Íslendingum enn og aftur til hamingju með Hörpu.

Íslandi og íslenskri hámenningu allt.

Hrifning á opnunartónleikunum

Athugasemdir

[Gunnar Heiðarsson, 5.5.2011 kl. 10:12]

Sæl Begljót.

Vissulega er Harpan glæsilegt hús. En ég get ekki verið sammála þér um að nauðsynlegt hafi verið að klára það núna, á þeim tímum sem ríkiskassinn er rekinn fyrir lánsfé. Þegar svo stendur á á að sjálf sögðu að forgangsraða, það á að slá á frest öllu sem hægt er, til að halda uppi grunnþjónustunni. Þetta var ekki gert, því miður.

Harpan er eitt af þeim verkefnum sem gat beðið, ásamt ESB umsókn, stjórnlagaþingi og fleirum málum. Eini plúsinn sem ég sá við að haldið yrði áfram byggingu Hörpunnar, var sú vinna sem það skapaði, jafnvel þó sá mannskapur hafi að stórum hluta verið erlendir verkamenn.

Sumir nefndu sem rök fyrir því að ekki skyldi haldið áfram, að nota hefði átt þessa byggingu sem minnisvarða um hrunið. Þessi rök voru mér ekki að skapi, við þurfum engan minnisvarða um þann harmleik. Eina ástæða þess að ég vildi fresta byggingunni var vegna þess að ég taldi að betur hefði mátt nýta þá fjármuni sem það kostaði, í annað.

En nú hefur Harpan verið opnuð og því ekki hægt að velta sér upp úr því lengur hvort rétt eða rangt hafi verið að halda áfram, heldur ber að fagna. Nafn hennar er flott og húsið sjálf glæsilegt.

[Ásthildur Cesil Þórðardóttir, 5.5.2011 kl. 10:34]

Já sammálá því Gunnar.   Bergljót Ég vona að opnunin hafi verið ánægjuleg á sýningunni þinni.  Ég er ákveðin í að kíkja við jafnvel á þarnæstu heldi, vona að hún verði ennþá í gangi þá.  Bestu kveðjur Ásthildur.

[Bergljót Gunnarsdóttir, 5.5.2011 kl. 10:38]

Sæll Gunnar, og takk fyrir tilskrifið.

Við erum   sammála um að húsið var rándýrt,  en það sem ég var að reyna að benda á er að Harpan, og það sem hún stendur fyrir, er liklegt til að verða lyftistöng fyrir andann. Það er ekki síður mikilvægt en sparnaður og ráðdeild, sérstaklega á þessum erfiðu tímum.

Forgangsröðun er alltaf álitamál og góðir hlutir geta komið úr ólíklegustu áttum. Svo er bara að vona að ég reynist sannspá.

[Bergljót Gunnarsdóttir, 5.5.2011 kl. 10:43]

Ásthildur mín, það verður opið til 25. maí. alla daga frá kl. 10 - 22. Geturðu e.t.v.látið mig vita hvenær það yrði, mig langar svo að heilsa upp á þig og ég bý í nágrenninu.