Eiturlyf og neysla þeirra

Þessi hræðilega árás sonar á föður,  er enn eitt dæmið um afleiðingar eiturlyfjanotkunar. Ég óska Ólafi góðs bata, þó hægt fari, og auðvitað vonum við öll að hann nái fullum bata. 

Fíkniefnin tröllríða heimsbyggðinni og virðist ekkert lát á. Ég vona að Íslendingar fylki sér um að sýna enga miskunn í þeim málum, hvorki heima fyrir né erlendis. Það mætti alveg koma inn á afleiðingar þessa strax í yngstu deildum grunnskóla, til að undirbúa og  festa í minni barnanna  hverslags vágest er um að ræða. Við vitum öll að fíkniefni eru boðin barnungu fólki og það í skólunum. Það verður að hamra inn í höfuðið á þeim að segja nei og standa við það, og það verður að beita fræðslu, fræðslu, fræðslu.

Það má líka gjarnan hamra á því við aðeins eldri nemendur, hversu skelfilegar afleiðingar neyslu eru, ekki bara á þolandann, heldur alla fjölskyldu hans.

Við verðum bara að taka á dæminu, og láta ekki eins og það sé verið að brjóta á rétti íslenskra fíkniefna glæpamanna sem lenda í erlendum fangelsum og ætlast til að þeim sé  bjargað af íslenskum yfirvöldum. Þessir glæpamenn verða bara að vita hver refsingin er, áður en þeir fara af stað.

Það er óbærilegt að lesa svona fréttir aftur og aftur, og viðhorfið oftast vorkunn með þeim sem græða á að útdeila eitrinu, þannig að það mætti skilja að maður ætti að senda þeim pakka í fangelsið eða eitthvað í þá veruna. Verst finnst mér þó tilhugsunin um að þeir sem fá refsinguna eru ekki hinir eiginlegu glæpamenn, heldur handbendi þeirra sem hafa peningana og skipuleggja glæpina, en þeir sleppa nær oftast, illu heilli.

Því miður eru þessir menn sem sækja eitrið í mörgum tilvikum, jafnvel flestum, fíklar sjálfir og þeim þarf að hjálpa ef það er hægt. En ef þeir eru ekki ruglaðari en svo að þeim er treyst til að sækja þennan rándýra varning, gæti ömurleg fangelsisvistin mögulega fengið þá til að hugsa, og hugsa vel um hvað þeir eru að gera öðrum. Það gæti etv.? hjálpað til við meðferðina í kjölfarið.

 

Líðan Ólafs óbreytt

Athugasemdir

[albert (IP-tala skráð) 19.11.2010 kl. 11:47]

Góð grein, en hvað getum við gert þegar heil starfstett er fylgjandi lögleiðingu eiturlyfja, en það er fjölmiðlastéttin. Þegar lögreglan kom inní Iðnskólann komu ansi margir fréttamenn og voru brjálaðir að þarna væri verið að brjóta á friðhelgi nemenda.  Núna er vandamál í grunnskólum kannabisnotkun barna og margir foreldrar eru sáttir og halda að þau séu með lækningarjurt i höndunum. Blaðamenn fjalla aldrei um hvað er eiginlega að gerast þegar 13-16ára unglingar hverfa og það er auglyst eftir þeim í fréttum. Hvaða fólk er t.d. að kaupa af þessu fólki kókain, en það eru ekki rónarnir heldur, oft vel stætt fólk, sem fjármagnar svona harmleiki.

[Bergljót Gunnarsdóttir, 19.11.2010 kl. 13:55]

Eins og ég sagði, þarf fræðslan að byrja strax í neðstu bekkjum grunnskóla. Reykingar hafa stórminnkað og á sú fræðsla sem þar fer fram ekki minnstan þátt í því. En betur má ef duga skal. Við bara megum ekki gefast upp fyrir þessu.

Ég held að fólk hugsi bara ekki fyrr en það hefur þetta í kringum sig. Hver vill horfa upp á  börn, allt niður í 12 ára selja sig fyrir næsta skammti. Kannabis er ekki skaðlaust efni eins og svo margir halda fram. Að vísu ánetjast ekki allir efninu, en hver hefur ekki heyrt um hasshausa. Ég hef séð allmarga hasshausa um dagana og þeir eru ekkert annað en fíklar. Síðan leiðir þetta hvert af öðru og áður en vitað er af eru unglingarnir orðnir að harðsvíruðum eiturlyfjaneytendum.

Ég er ekkert að bulla út í loftið, ég tala af reynslu.